كلام رجالة : عن المجتمع اللي بيمسخنا في قوالبه الجامدة

في حاجات في مجتمعنا قادرة انها تسبب صداع دائم لا يشفي و لا يغادرك ابدا، الصداع مش معناه انه الم في الرأس ، بالعكس هو حالة نشاط او اضطراب ذهني يعيق عن الادارك او التفكير المنظم.

انا صداعي الاكبر هو الادوار الاجتماعية للذكور و الاناث ، ايوة سيمون دي بوفوار عندها حق لما قالت : " خلقت انثي و لم اخلق امرأة" . و هي بذلك تشير الي انها خلقت انثي بيولوجيا لكن الادوار الاجتماعية التي تحولها الي امرأة ، اسبغها عليها المجتمع. و دة حقيقي في الحالتين ان الذكور كمان بيولدوا ذكور انما الرجولية هي مجمل صفات و ادوار يفرضها المجتمع علي الذكور.

يعني ممكن نشوف دة من نعومة الاظافر ، من اول البنات اللي بتلبس بمبي و الولاد لبني و اللعب اللي بتجهز الاطفال لادوارهم، البنات تتعود علي انها هي تكون مراعية لمن حولها ، فهي اللي بتسكت عروستها و تنيمها و تأكلها و كلها ادوار الامومة  و في اعمار اكبر يبقي عدة المطبخ او العروسة اللي بتلبسها علي الموضة و تجهزها انها تبقي احلي و تتعلم تكنبكات الحفاظ علي الجمال تأهيلا لها للعب دور " انثي" في حياة "ذكر".و الولاد يترسخ كمان  فيه انه قوي و كل العابه تنمي قدراته الجسدية و كمان يلعب العاب تنمي القدرات الذهنية زي الميكانو

كمان التربية بترسخ حاجات زي البنت ما تعليش صوتها و ما تتخانقش ، و الولد مهما كان حزين و متألم ما يعيطش . نهاية بان البنات بتتزق زق عشان تدرس تخصصات معينة و كمان الولاد ، يعني البنت اللي تتلحس في عقلها و تقرر تدرس هندسة ميكانيكا ، اكيد ها تتمترس و تدافع عن نفسها ضد حرب عائلية ضروس ، و الولد اللي يقرر يدرس تصميم ازياء او حلي برضه ها يدافع عن نفسه علي طول الخط ، غير انه ممكن يتوصم بحاجات مش لطيفة اجتماعيا  .

انا باكتب التدوينة دي عشان اقول لكم علي مبادرة في نظرة للدراسات النسوية، اسمها كلام رجالة.

ليه كلام رجالة. عشان عدة اسباب ( من وجهة نظري)

 محاربة الاضطهاد و القهر و القمع اللي قائم علي النساء مش معناه محاربة الرجال، بل احنا بنحارب الابوية ، الفكرة مش البشر و الابوية هي تسلط الاب ( بكل تنويعاته) الاب الاكبر سنا ، الاكثر سلطة ، عشان كدة اكتر ناس بتتأثر بالابوية هم النساء و الشباب ، لان الابوية بتعلي من قيمة الذكر الاكبر سنا الاوسع نفوذا ، ما دون ذلك يتم قهره.

و دة بينقلنا لنقطة تانية ان الرجالة كمان ضحايا للابوية ، في مواقف اد ايه الرجالة بيتجبروا انهم يأخدوا ردودة افعال معينة ، بتنتقص من ادميتهم و انسانيتهم ، تحت مسمي انت راجل انشف. انا عمري ما ها انسي المشهد اللي الطفل بيلعب بالحمامة و يجي الجد عتريس في فيلم (شئ من الخوف) و يبدبح الطير، مع دم الطير اللي سال ، سال امل الطفل انه يحافظ علي انسانيته برة عنف القوالب و الادوار سابقة الصنع

و اخيرا مهم اوي اننا نعرف اننا رغم اننا متألمين من ان المجتمع و الاهل و الاصدقاء بيجرونا لادوار معينة تخنقنا، الا اننا احنا كمان بنعيد انتاج الادوار دي بشكل اوي باخر ، يعني حتي لو انا رافضة ان الرجل يبقي ادواره واحد و اتنين و تلات .. بس لا انكر خيبتي اذا ما قامش بكل الادوار دي ، يعني انه الحامي و اللي بيوفر الضمان المالي و الضمان بكافة اشكاله.

و عشان نكسر الدائرة الشريرة، نكتب عن ازاي الرجالة بتصنعوا في مجتمعنا ، الكل مدعو للكتابة ، بنات و ولاد، اي بنت اكيد شافت اخ او حبيب او صديق بيعاني من قيد الابوية او بيستغله لمصلحته.

كلام رجالة فرصه للبوح ، فرصة نقف ادام مراياتنا نشوف المجتمع مسخنا ازاي و قد ايه ،  و فرصة نطلب من بعض العون و نستلهم من تجارب بعض و نبتدي رحلتنا في التحرر

اشترك في مبادرة كلام رجالة بقصتك و انتي كمان شاركي معانا